Es isch e grosse Luxus, weme sone Strand näb der Hustür het! I nützes vou us u ga jede Tag mit Fründe

Der Fuessbauclub vo Cadiz spiut ir Segunda Division (LaLiga2) und isch im Moment uf Platz 5. Me merkt sofort, wenn dass d Matche si, wüu nämlech ganz Cadiz usgseht wines gäub-blaus Meer, d Farbe vo Cadiz

Nach 10 Täg si Papa und Anouk leider schowider hei... Mir hei sehr viu schöni Sache zäme erläbt, si ga reise, viu a Strand u hei natürlech viu Guets gässe. Es isch wunderschön gis, sie wider ds gseh nach so langer zyt u i has sehr gnosse

Der Strand vo Bolonia isch e unberüehrte und wunderschöne Strand ir nöchi vo Tarifa. Es isch es Paradies für Windsurfer, me cha aber o ga campe. Näbe de Düne si d Ruine vore römische Sidlig usgrabe worde, u dert hei d Römer vor über 2000 Jahr mau Thunfisch verarbeitet.

Da ds Wätter sehr guet isch gsi, heimer bis nach Afrika übere gseh, was sehr idrücklech isch gsi. Mir si natürlech o uf die 30 Meter höchi Sanddüne ufe, u hei e wahnsinnigi Ussicht ufe Strand gha.

I ha ihne unbedingt der Strand vo Caños de Meca wöue zeige, wüus eine vo mine Lieblingsstränd in Andalusie isch, u es het ihne o sehr gfaue.

Bsuech in Vejer mit Papa und Anouk

Am 11. April si ändlech der Papa und d Anouk in Cadiz acho! I hami sehr sehr gfröit, si wider ds gseh! Mir si ids Hotel u hei ds Gepäck dert gla u si när chli dür Cadiz gloffe. Es isch sehr speziell gsi, mini Familie in Cadiz ds ha, wüu zwöi ganz verschidnegi Wäute ufenang träffe. Mir heis sehr schön gha zäme, u zum Glück isch ds Wätter super gsi.

Caños de Meca isch e chline Ort ar Costa de Luz. Der starch Ostwind u de risige Wäue mache der Ort zumne beliebte Ziel für Kite- und Windsurfer. Direkt näbe Caños de Meca hets e Parque Natural mit wunderschöne Piniewäuder mit Wanderwäge. Die chlini Bucht isch wunderschön u erinneret chli ad Karibik.

Medina isch äbefaus ufemne Hügu gläge, u mir hei e wunderschöni Ussicht über ds Land gha, womi sehr ad Schwitz erinneret het...

Vejer isch eis vo mine Lieblingsstädli in Spanie. Es isch ufemne Hügu gläge, nach vor Küste. Vejer isch ds berüemtiste wisse Dorf in Andalusie u sehr beliebt unger Touriste. Da's im Jahr 711 vode Musulmane isch igno worde, fingt me hie und da es musulmanischs Bouwärch, so wie dä Brunne uf der Plaza España (Biud obe). Ide änge, steile Gässli fingtme viu Kafis u chlini Restaurants, Kunst- und Schmuklädeli u gmütlechi Plätz mit Bänk zum usruhie

Arcos isch eis vode berüemte wisse Dörfer (pueblos blancos) ir Provinz Cadiz. Es ligt ir Sierra de Cadiz (Gebirge vo Cadiz), u isch sehr speziell gläge, ufemne steile Felse diräkt überemne Fluss. D Gässli si sehr äng, u vode Ussichtspünkt gseht me wit über ds Land. Arcos, was "Boge" heisst, isch prägt vode vilne Stützböge, wome fasch i jedere Gass gseht.

In Arcos heimer no es paar Roubvögu atroffe...

Es isch es chlises Städli nördlech vo Cadiz, bekannt für ds feine Ässe u füre Sherry. Sanlucar ligt diräkt am Fluss Guadalquivir, u vo dert us isch der Kolumbus uf sini 3. Amerikareis. Mir hei no es chlises Cafe entdeckt, im Innehof vore Burg, wo vore Gräfin gfüert wird.

Das wunderschöne Städli ligt im Landesinnere, öppe e Stund vo Cadiz entfernt. Es isch d Heimatstadt vom berüemte Sherry, wo uf spanisch "Jerez" heisst. D Stadt isch o aus "Sevillas Schwöster" bekannt.

Stefan und Monika (Onkel und Tante) si mi in Cadiz cho bsueche. Zersch hani ihne natürlech Cadiz zeigt... Später hani mit ihne dörfe mitreise nach Jerez, Sanlucar, Arcos de la Frontera, Vejer, Media, Canos de Meca u El Puerto Santa Maria. Mir hei sehr viu wunderschöni Orte zäme entdeckt u natürlech viu guet gässe.

La Clandestina isch üses Lieblingskafi. Es isch glichzytig e chline Büecherlade u es git dr best Chaitee in Cadiz... 

Conil isch eis vode wisse Dörfer in Cadiz,u i ha mit der Silje u dr Amy e Tagesusflug dert häre gmacht. Die hübsche wisse Gässli hei viu Charme, u dr Strand isch wunderschön...

Summmeeer! Plötzlech isches 27 Grad warm, u mir gö wider a Strand. Es isch so heiss gsi, dasmer sogar si ga bade ids Meer, o we dr Atlantik no zimlech chaut isch...

Cadiz, Costa de Luz... ds isch eine vode Sunneungergäng, vo ig fasch jede Abe darf aluege

Carnavales de Cadiz! Das isch öppis, wo d Spanier scho 3 Monat im vorus drüber rede.

Es isch es Volksfest, mitem spöttische Gsang vo verschidnige Gruppene im Mittupunkt. Er duret länger aus 11 Täg u faht a mitem Wettbewärb vode verschidnige Gsangsgruppene im "Gran Teatro Falla" a. Die verschidnige Gsangsgruppene heisse Chirigotas, Comparsas, Coros y Cuartetos. Si singe uf chline Bühnine, Wäge oder direkt uf dr Strass, mit allerlei Instrumänt. Si si aui sehr kreativ verchleidet u füehre wärend em singe chlini Theater uf. Dr Gsang isch wie gseit, sehr spöttisch, mit viu Witze u ou kritische Inhaute, meistens o chli azüglech. Ig aus Guiri (typisches Wort in Cadiz für "Usländerin") ha nid soo viu verstange, was aber onid schlimm isch gsi.

Eine vode Höhepunkte isch d Nacht vom Samsti, 25. Februar, gsi ("Noche de Carnaval"). Familie u Fründe verchleide sech u zieh dür d Strasse, es wird viu gässe u trunke (vorauem trunke). Am Sunnti gits när der gross Umzug mit bis zu 100 000 Lüt. D Strasse si vou! Me chunnt ke Schritt füre u o kene zrüg. Ds isch chli müesam gsi, es isch wük unmüglech, irgendwo häre ds cho.

Wasmer ufgfaue isch a däm Carnaval, isch dass sech wük aui verchleide, egau weles Auter. Si stecke viu Zyt u Gäud id Kostüm, u wär sech nid verchleidet, isch definitiv ke Spanier. Es wird o wahnsinnig viu trunke, u es het enorm viu Lüt ide Strassene. Dr Carnaval in Cadiz isch würklech speziell, aber i müesst's iz nid es zwöits Mau ha...

Am Mänti,  20. Februar, isch mini Mama in Cadiz acho. 

Mir hei imne wunderschöne Hotel gewohnt (Senator Spa Wellness). I ha ihre Cadiz zeigt, au mini Lieblingsplätz, schöne Kafis, mini Schuu, aui Stränd u natürlech ds Zentrum säuber. Mir si ono zu mire Gastfamilie ga es Kafi trinke. 

Am Fritimorge simer ufe Zug nach Sevilla, womer im Barrio Santa Cruz imne ganz härzige Hotel gwohnt hei. Mir hei Sevilla erkundet u's sehr schön gha. Am Mänti, 27. Februar, isch d Mama leider schowider heigfloge. 

Am Abe vom 7. februar si Mirja und Lynn, zwöi Fründinne us Bärn, in Cadiz acho. Si si mi für 5 täg cho bsueche u hei imne Hostel gwohnt. Es isch mega schön gsi mit ihne, i ha ihne d Stadt u mini Lieblingsorte zeigt, mir si am Meer ghocket, hei feini picnics kouft, u viu glacht. d zyt isch viu ds schnäu verbi gange...

Am 7. Februar heimer ar Silje ihre 18. Geburtstag gfiret. Mir si i eis vo üsne Lieblingsrestaurants am Strand ga ässe.

Mini Spanischklass usem Gymer Chilefäud macht in Cadiz e 2wüchige Sprachufenthaut. Es isch sehr spezieu gsi, wider live mit Bärner ds rede nachemne haube Jahr... Aber es isch mega schön gsi, aui ds gseh

Mit Fründinne id Stadt öppis ga trinke ghört fasch zu mire Tagesroutine. Mir kenne ize sicher die schönschte Kafis wos git in Cadiz

Die 2. Städtereis mit mire Organisation isch nach Madrid gsi. I dene 4 täg heimer viu gseh: Palacio Real, Prado Museum, Plaza Mayor, Parque del Retiro, Puerta del Sol, Puerta de Alcalà, Gran Via u ds ganze Zentrum. Es het sehr viu auti, idrücklechi Geböide, was mir natürlech sehr gfaut. I liebe d Stadt, es isch sehr lebändig, farbig u viusitig.

Ächti italienischi pizza! Nid eifach ds finde hie...

Wo Cadiz ufhört u ds Meer afat

A Silvester simer zu mire Tante nach San Fernando (es Städtli ca. 20 Minute vo Cadiz entfernt). Es isch wider die ganzi Familie cho u ds Esse isch wahnsinnig guet gsi! 

In Spanie gits a Silvester e spezielli Tradition: Am 00:00, we d Glogge 12 mau schlat, isst me zu jedem Gloggeschlag ei Trube. Me het immer 1 sekunde zyt, die Trube ds ässe, u innerhaut vo de 12 Gloggeschläg mues me aui 12 Trube gässe ha. Natürlech hani das o gmacht u wär fasch erstickt. Es isch sehr spannend, e Iblick i die andere Traditione vo Spanie ds übercho. Für d Spanier si ihri Traditione sehr wichtig, u si si wahnsinnig stouz druf.

In Spanie fiiret me Wiehnachte am 25. Es het natürlech nomau es Feschtässe gä, genau so guet wie am vorige Abe . Mini Gastfamilie hetmer  e Chueche bachet mit Cherzli u si hei aui für mi gsunge. U si heimer sogar Gschänkli kouft, soo härzig! I hane sehr schöne Geburtstag gha, o dank ihne. Sie hei mi ufgno aus würdi zu dere Familie ghöre.

Am 25. Dezämber bini in Spanie 17ni worde. I ha au mini Gschänkli a Strand gno use dert uspackt, wüu der Geburtstag am Strand fiire isch scho öppis speziells! I ha viu Päckli übercho us dr Schwitz, u eis sogar us Australie.

Am Heiligabe isches so warm gsi wie nonie im Dezämber. U da i nonie a Wiehnachte im Meer bi gis, hani die Müglechkeit natürlech packt. (woni usem Wasser bi cho hani übrigens immerno warm gha)

Am 24. Dezämber simer am abe zu mire "Gasttante" ga Znachtässe. Die ganzi Familie isch cho u es isch gmüetlech gsi, mir hei spanischi Wiehnachtslieder glost.  Es het seeehr viu Esse gä, u es isch sehr fein gsi.

Perspektivewächsu

Nachem Wandere am Samsti simer no ids wunderschöne Dörfli Grazalema gfahre u si es Cafe ga trinke...

Am Samstimorge simer früe ufgstange  und hei üses Picnic parat gmacht. När simer mitem Outo uf ds Land gfahre u dert ga spaziere. Die ganzi Familie isch mitcho. Es isch agnähm warm gsi. D Landschaft isch wunderschön...

Da mir schuufrei hei gah, simer e nöie Strand ga entdecke

Hüt isches so warm gsi, dass Jeans definitiv z heiss si gsi, aber irgendwie chame ja im Dezember nid i churze hose umeloufe....

Ussicht vo mim Klassezimmer

In Cadiz hets sehr schöni Plätz mit viu Pflanze und Bänkli. Plaza Mina isch einä vo mine Lieblingsplätz, es het sogar e chline Büecher-Kiosk.

So Sunneungergäng ghöre in Cadiz zum Tagesablouf...

Mit aune andere Ustuschschüeler bini 4 Täg uf Malaga. Es isch sehr schön gsi, aui wider ds gseh, u sehr spannend ds ghöre, wies aune geit. Mir si wine grossi Familie u d Zyt in Malaga isch viz z schnäu verbi.

Jerez, la ciudad del vino

Bett i mim Lieblingspark

D Stella us Sevilla het ihre Geburtstag in Cadiz verbracht. Dr Überraschigschueche isch glunge (u sehr fein gsi).

Mit 3 Kolleginne bini ei Tag uf Sevilla. Ds isch die schönsti Stadt, woni bis iz vo Spanie gseh ha, u ds bewöukte Rägewätter hets sehr gmüetlech gmacht.

E Spaziergag dür Cadiz bi däm Wätter isch öppis vom Schönste wome cha mache.

Wede mau zuefäuigerwis in Cadiz bisch, de chum eifach a Strand. Wüu dert fingsch äue mi (weni nid schuu ha oder schlafe).

Dr chli Strand "Santa Maria del Mar" ligt 2 Minute vo mim Hus entfernt.

I dere Wuche in Barcelona hei sech Lüt us der ganze Wäut troffe u nöii Fründschafte gschlosse. Mir hei zämä Barcelona erkundet u viu gmüetlechi Orte entdeckt, fein gässä u die spanischi Kultur lehre kenne.